မြန်မာနိုင်ငံ၏ တစ်ဆက်တစ်စပ်တည်းသော မြန်မာ့သမိုင်းစဉ် စာအုပ်ပုံနှိပ်ထုတ်ဝေနိုင်ရေး အတွက် ညှိနှိုင်းဆွေးနွေးပွဲကို ၂၁.၈.၂၀၂၅ ရက်နေ့ နံနက် (၁၀:၀၀) နာရီအချိန်တွင် သာသနာရေး နှင့် ယဉ်ကျေးမှုဝန်ကြီးဌာန လောကနတ်အစည်းအဝေးခန်းမ၌ ကျင်းပပြုလုပ်ခဲ့ရာ သာသနာရေးနှင့် ယဉ်ကျေးမှုဝန်ကြီးဌာန ပြည်ထောင်စုဝန်ကြီး ဦးတင်ဦးလွင်၊ ဒုတိယဝန်ကြီး ဒေါ်နုမြဇံ၊ သာသနာရေးနှင့် ယဉ်ကျေးမှုဝန်ကြီးဌာန အမြဲတမ်းအတွင်းဝန်၊ ရှေးဟောင်းသုတေသနနှင့် အမျိုးသားပြတိုက်ဦးစီးဌာန ညွှန်ကြားရေးမှူးချုပ်၊ ကာကွယ်ရေးဝန်ကြီးဌာနမှ ကိုယ်စားလှယ် အရာရှိကြီးများ၊ မြန်မာ့သမိုင်းစဉ်စာအုပ် ပုံနှိပ်ထုတ်ဝေနိုင်ရေး စာမူတည်းဖြတ်ရေးအဖွဲ့မှ မြန်မာ့သမိုင်းပညာရှင်ကြီးများ၊ အကြံပေးပညာရှင်များ၊ လုပ်ငန်းအထောက်အကူပြုအဖွဲ့နှင့် ဌာနဆိုင်ရာ သုတေသနပညာရှင်ဝန်ထမ်းများ တက်ရောက်ကြပါသည်။
သာသနာရေးနှင့် ယဉ်ကျေးမှုဝန်ကြီးဌာန၊ ပြည်ထောင်စုဝန်ကြီးက နိုင်ငံတော်အကြီးအကဲ ၏ လမ်းညွှန်ချက်နှင့်အညီ တစ်ဆက်တစ်စပ်တည်းသော မြန်မာ့သမိုင်းစဉ်စာအုပ် ပုံနှိပ်ထုတ်ဝေနိုင်ရေး စာမူတည်းဖြတ်ရေးအဖွဲ့၊ လုပ်ငန်းအထောက်အကူပြုအဖွဲ့များ ဖွဲ့စည်း၍ ဆောင်ရွက်ခဲ့ပါ ကြောင်း၊ တစ်ဆက်တစ်စပ်တည်းသော မြန်မာ့သမိုင်းစဉ်ဖြစ်သည့် လူတူပရိုင်းမိတ်များ ပေါ်ပေါက် လာသည့် ကာလမှစ၍ ပျုခေတ်ကာလအထိ အထောက်အထားအချက်အလက်များနှင့်ပတ်သက်၍ ညှိနှိုင်း ဆွေးနွေးပွဲများကို ၂၀၂၂ ခုနှစ်မှစ၍ ၂၀၂၅ ခုနှစ်အထိ (၁၃)ကြိမ် ပြုလုပ်ခဲ့ပြီး ၎င်းသမိုင်းစဉ် အထောက်အထားအချက်အလက်များကို ပြင်ဆင်တည်းဖြတ်ခြင်း၊ ဖြည့်စွက်ခြင်းများ ဆောင်ရွက်ခဲ့ ပြီးနောက် မြန်မာ့သမိုင်းစဉ် (မူကြမ်း) များ ပြုစုထားပြီးဖြစ်သဖြင့် အဆိုပါ စာအုပ်(မူကြမ်း) များအား ပုံနှိပ်ထုတ်ဝေနိုင်ရေးအတွက် ရှေးဟောင်းသုတေသနပညာရှင်များနှင့် မြန်မာသမိုင်းအဖွဲ့ပညာရှင် များပူးပေါင်း၍သမိုင်းကြောင်းအချက်အလက်များ မှားယွင်းမှုမရှိစေရေးနှင့် အယူအဆများလွဲချော်မှု မရှိစေရေးတို့အတွက် မြန်မာသမိုင်းအဖွဲ့မှ ပညာရှင်များပါဝင်သည့် စာမူတည်းဖြတ်ရေးအဖွဲ့ကို ဖွဲ့စည်းတာဝန် ပေးအပ်ခဲ့ပါကြောင်း၊ အဆိုပါအဖွဲ့နှင့် ပူးပေါင်း၍ လိုအပ်သည့် အချက်အလက်များ၊ မှတ်တမ်းဓာတ်ပုံများ၊ မြေပုံများရှာဖွေရေးသား ပြုစုထောက်ပံ့ခြင်းနှင့် ပုံနှိပ်ရန် ပြင်ဆင်ခြင်းလုပ်ငန်း တို့ကို ရှေးဟောင်းသုတေသနနှင့် အမျိုးသားပြတိုက်ဦးစီးဌာန၊ ဒုတိယညွှန်ကြားရေးမှူးချုပ် (ပြတိုက်များ)ကဦးဆောင်ကာ အထောက်အကူပြုအဖွဲ့ဖွဲ့စည်း၍ ရန်ကုန်ဌာနခွဲတွင်၂၀-၆-၂၀၂၅ ရက်နေ့မှ ၂၀-၇-၂၀၂၅ ရက်နေ့အထိ ဆောင်ရွက်ခဲ့ပါကြောင်း၊ တစ်ဆက်တစ်စပ်တည်းသော မြန်မာ့သမိုင်းစဉ် စာအုပ်ပုံနှိပ်ထုတ်ဝေနိုင်ရေးအတွက် အဖက်ဖက်မှ ပူးပေါင်းပါဝင်ဆောင်ရွက် နေကြသည့် ဘာသာရပ်နယ်ပယ်အသီးအသီးက ပညာရှင်များ၊ စာမူတည်းဖြတ်ရေးအဖွဲ့မှ မြန်မာ သမိုင်းပညာရှင်များအဖွဲ့မှ ပညာရှင်ကြီးများ၊ ကာကွယ်ရေးဝန်ကြီးဌာနမှ ကိုယ်စားလှယ်များ၊ အထောက်အကူပြုအဖွဲ့နှင့် အထောက်အထားအချက်အလက်များ ရေးသားပြုစုရန် ယခင်သမိုင်းစဉ် ဆွေးနွေးပွဲများတွင် ပါဝင်တက်ရောက်ဆွေးနွေးပေးခဲ့ကြသည့် စာတမ်းရှင်များ၊ ပြင်ပသုတေသီများ အားလည်း အသိအမှတ်ပြုပါကြောင်းစသည်ဖြင့် ပြောကြားခဲ့ပါသည်။
ဆက်လက်၍ သာသနာရေးနှင့် ယဉ်ကျေးမှုဝန်ကြီးဌာန ဒုတိယဝန်ကြီးက တစ်ဆက်တစ်စပ် တည်းသော မြန်မာ့သမိုင်းစဉ်စာအုပ် ပုံနှိပ်ထုတ်ဝေနိုင်ရေးနှင့်ပတ်သက်၍ ဆွေးနွေးပွဲများမှ ပညာရှင် ကြီးများ၏ အကြံပြုလမ်းညွှန်ချက်များဖြင့် တည်းဖြတ်ပြင်ဆင် ရေးသားပြုစုထားသည့် “မြန်မာ့မြေလွှာဖြစ်တည်မှုနှင့် မြန်မာ့ပရိုင်းမိတ် ကျောက်ဖြစ်ရုပ်ကြွင်း ရှာဖွေတွေ့ရှိမှု” ၊ “မြန်မာ့ ကျောက်ခေတ်”၊ “မြန်မာ့ကြေးခေတ်၊ သံခေတ်” နှင့် “ပျူခေတ် ရှေးဦးမြို့ပြ ယဉ်ကျေးမှု” စသည့် သမိုင်းစဉ်စာအုပ် (မူကြမ်း) များကို တည်းဖြတ်ပြုစုထားပြီး ဖြစ်ပါကြောင်း၊ အဆိုပါ တည်းဖြတ်ပြုစု ထားသည့် စာအုပ်(မူကြမ်း)များအပေါ် သက်ဆိုင်ရာကဏ္ဍအလိုက် ထပ်မံပြင်ဆင်ဖြည့်စွက်ရန် လိုအပ်သည့်အချက်များအား ဆွေးနွေးတင်ပြနိုင်ရန် ညှိနှိုင်းဆွေးနွေးပွဲ ပြုလုပ်ခြင်းဖြစ်ပါကြောင်း စသည်ဖြင့် ဆွေးနွေးတင်ပြပါသည်။
ဆွေးနွေးပွဲသို့ တက်ရောက်လာသည့် မြန်မာသမိုင်းပညာရှင်များအဖွဲ့ ဒုတိယဥက္ကဋ္ဌ (၁) ဒေါက်တာတိုးလှက ပုံနှိပ်ထုတ်ဝေခြင်းနှင့်ပတ်သက်၍ စာအုပ်(မူကြမ်း)များရှိ အခန်းခေါင်းစဉ်များ တွင်စာမျက်နှာနံပါတ်များ တပ်ဆင်ရန် မလိုအပ်ပါကြောင်း၊ ကျောက်လက်နက်များကို အမျိုး အစားလိုက် ရှင်းလင်းဖော်ပြရန်လိုအပ်ပါကြောင်း၊ နိုင်ငံတော်အကြီးအကဲ၏ သဝဏ်လွှာအား စာအုပ်၏ ရှေ့ဆုံးတွင် ထားရှိရမည်ဖြစ်ပါကြောင်း ဆွေးနွေးခဲ့ပြီး ကာကွယ်ရေးဝန်ကြီးဌာနမှ တာဝန်ရှိသူက သမိုင်းစဉ်စာအုပ် ထုတ်ဝေရေးနှင့်ပတ်သက်ပြီး စာအုပ်အရွယ်အစားနှင့် မျက်နှာဖုံး ပုံစံများ အတည်ပြုနိုင်ရေး၊ ဆက်လက်ဆောင်ရွက်ရမည့် လုပ်ငန်းစဉ်နှင့် လိုအပ်ချက်များအား ဩဂုတ်လကုန်အပြီး ပြင်ဆင်ပေးပို့နိုင်ရေးတို့နှင့်ပတ်သက်၍ တင်ပြဆွေးနွေးခဲ့ပါသည်။
ထို့နောက် ဆက်လက်၍ မြန်မာသမိုင်းပညာရှင်များအဖွဲ့ ဒေါက်တာစိန်မြင့်က စာအုပ် (မူကြမ်း)များတွင် အင်္ဂလိပ်စာလုံးများအား ဘာသာပြန်ရာတွင် ဝေါဟာရမကွဲလွဲအောင် ဆောင်ရွက် ရန် လိုအပ်ပါကြောင်း၊ ရှေးဟောင်းသုတေသနပညာရှင် ညွှန်ကြားရေးမှူးချုပ်(ငြိမ်း) ဦးညွန့်ဟန်က ပျူခေတ်သမိုင်းစဉ်နှင့်ပတ်သက်၍ ပျူခေတ်နှင့်အပြိုင် အခြားမြို့ပြများကို ဖော်ပြရာတွင် သာဂရ မြို့ဟောင်းကို ထည့်သွင်းမဖော်ပြသင့်ကြောင်း ဆွေးနွေးခဲ့ပြီး၊ ရှေးဟောင်းသုတေသနပညာရှင် ဒေါက်တာသိန်းလွင်က ကျောက်ခေတ်သမိုင်းစဉ်တွင် ဓာတ်ပုံနှင့် ဆွဲပုံများကို ယှဉ်တွဲဖော်ပြသင့် ပါကြောင်း၊ ကျောက်ခေတ်သစ် ဂူများကို ပုံနှင့်တည်နေရာကို ဖော်ပြသင့်ပါကြောင်း ဆွေးနွေးခဲ့ ပါသည်။ ရှေးဟောင်းသုတေသနပညာရှင် ဦးစိန်ဝင်းက ပျူစာပေနှင့်ပတ်သက်၍ ခေတ်ကာလများ တသတ်မှတ်တည်းဖြစ်အောင် ညှိနှိုင်းဆောင်ရွက်ရမည် ဖြစ်ပါကြောင်း၊ ရန်ကုန်တက္ကသိုလ်မှ ပါမောက္ခ ဒေါက်တာကလျာမြတ်မြတ်ထွေးမှ ကျမ်းကိုးစာရင်း ဖော်ပြမှုနှင့်ပတ်သက်၍ ကျမ်းကိုး စာရင်းထည့်သွင်းသည့် ပုံစံများ တူညီရမည်ဖြစ်ပါကြောင်း ဆွေးနွေးခဲ့ပါသည်။
သာသနာရေးနှင့် ယဉ်ကျေးမှုဝန်ကြီးဌာန ပြည်ထောင်စုဝန်ကြီးက ဆွေးနွေးချက်များအပေါ် သုံးသပ်ဆွေးနွေးခဲ့ပြီး နိဂုံးချုပ်အမှာစကားပြောကြားရာတွင် မြန်မာ့သမိုင်းစဉ် စာအုပ် (မူကြမ်း) များအား ပုံနှိပ်ရန် တစ်ဆက်တစ်စပ်တည်းသော မြန်မာ့သမိုင်းစဉ် ခေါင်းစဉ်ကို ဦးစားပေး ဖော်ပြရန် လိုအပ်ပါကြောင်း၊ စာအုပ်မျက်နှာဖုံး၊ စာရွက်အမျိုးအစား၊ Font Size များကို ဝိုင်းဝန်းညှိနှိုင်းဆွေးနွေး ဆောင်ရွက်သင့်ပါကြောင်း၊ စာအုပ်ထုတ်ဝေရာတွင်လည်း သမိုင်းကြောင်း ပုံစံအတိုင်း ထုတ်ဝေသွားရမည် ဖြစ်ပါကြောင်း၊ ပြုစုသူအမည်များကိုလည်း စာအုပ်တွင် ထည့်သွင်း ဖော်ပြနိုင်ရန် ဆောင်ရွက်မည်ဖြစ်ပါကြောင်းနှင့် ယခုဆွေနွေးပွဲများမှ ရရှိသည့် အကြံပြု လမ်းညွှန် ချက်များကို လိုက်နာ၍ ပိုမိုပြီးပြည့်စုံသည့် မြန်မာ့သမိုင်းစဉ်စာအုပ်အား ပုံနှိပ်ထုတ်ဝေနိုင်ရေး ရှေးဟောင်းသုတေသနနှင့် အမျိုးသားပြတိုက်ဦးစီးဌာနမှ တာဝန်ရှိသူများနှင့် မြန်မာသမိုင်းအဖွဲ့ ပညာရှင်ကြီးများက ဝိုင်းဝန်း၍ အထူးအလေးပေး ဆောင်ရွက်စေလိုပါကြောင်းပြောကြား၍ ညှိနှိုင်း ဆွေးနွေးပွဲအား (၁၂:၀၀) နာရီတွင် ရုတ်သိမ်းခဲ့ပါကြောင်း သတင်းရရှိပါသည်။
